अब आस टूटण लागी मां
सुनो जी अंबे
आस टूटण लागी मां
कि कद तक जोवां थारी बाट
कहो कीनियाणी मां
रिपु घन घनन घनन घण गाजै
आंसुं देख अव्वल गती आजै
साय करण मत देर लगा
अब सांस घुटन लागी मां
सुनो जी अंबा
आस टूटण लागी मां
कि कद तक जोवां थारी बाट
कहो कीनियाणी मां.... 2
विपदा रोज लपेटा मारै
सिंह चढ़ आज्यो संग सगत्यां रै
तारणहारा क्यूं नहीं तारे
अब सांस घुटण लागी मां
कहो जी अंबा
सांस घुटण लागी मां
कि कद तक जोवां थारी बाट
कहो कीनियाणी मां...... 2
जमपुर जाकर लाल ले आई
झट महिषासुर मार भगाई
साय करण शेखै के धाई
बिड़द मत भूलो मां
सुनो जी अंबे
बिड़द थारो लाजै मां
कि कद तक जोवां थारी बाट
कहो कीनियाणी मां..... 2
आवड़ री थानैं आण मेहाई
हर संकट दिखला प्रभुताई
प्रांजल रै मां रहिज्यो सहाई
अब तो आ ज्याओ मां
सुनो जी अंबे
अब तो आ ज्याओ मां
प्रहलाद सिंह कविया प्रांजल
No comments:
Post a Comment