सातम वाली झांकी चिरजा

Satam wali jhanki

सातम वाळी झांकी

थारी सातम वाळी झांकी,मन भावै लागै आछी
ओ म्हारा-2  मेहाई सरकार अनोखी थारी झांकी

थांरी मोत्यां मूरत जड़ाई(जड़ावां)
पन्ना री छाप सजाई(सजावां)
ओ अम्बा 2 घणो करयो(करां) सिणगार
अनोखी....


 थांरी मोहनी मूरत लुभावै,थांरे सेवक चँवर झुरावै
 ओ थानै 2 नित सत बारम्बार(ओ माता झालर री झनकार) अनोखी....


 थारे दूर देशां सु आवै,मनडै रा पुष्प चढ़ावै
 ओ लागै 2 भक्तां भीड़ अपार
 अनोखी....


 थांरो जबरो बिरद नीराळो,अगवानी गोरो कालो
 ओ अम्बा 2 पुष्प रह्या बरसाय(ओ अम्बा निरत करै दे ताल) अनोखी....


 मां संभली बनकर आज्यो,भक्ता नै दरश दिराओ(दिराज्यो)
मां ल्याजो 2 नवलख सगत्या साथ(आज्यो सातों बहना साथ) अनोखी...


 मां चील रूप धर आया,म्हारा सोया भाग जगाया
 मनड़ो दर्शण कर हर्षाय(सेवक दरसण कर हर्षाय)
 अनोखी....


 मां पुरै जग की आशा,नवलाख उड़ै आकाशां
 कीरत महेंद्र कविया गाय
 अनोखी...
 महेंद्र कविया भवानीपुरा

सेवक सोरा राख चिरजा

अरज सुण आवज्यो ये सगत्या सेवक जोवै बाट

मेहर कर आवज्यो ये अम्बे मां टाबर सोरा राख


 1थलवट पर जद मात पधारया,सात रूप सुरराय
     अम्बे मा सात रूप सुरराय
मामड़ घर उजियाश कियो मा-2 चारण कुल हर्षाय
अर्ज....


2 आवड़ आया आंगणे जद, कुमकुम पांव मण्डाय(धराय)
  अम्बे मां कुमकुम पाँव धराय
सातों बहना रमै आंगणे-2 देव पुष्प बरसाय
अर्ज...



3 आवड़ मारयो तेमड़ो जद,तेमङराय कहाय
  अम्बे मां तेमड़राय कहाय
डूंगर ऊपर आय बिराज्या-2 डुंगरराय कहाय
अर्ज....


4 आवड़ मां हिंगलाज स्वरूपा कई कई रूप धराय(बणाय)
  अम्बे मां कई कई रूप धराय
चाळकनेजी और स्वांगिया-2 गीगायी गिरराय
अर्ज....


5 सात समद स्याही कर जोओ,लेखन सब वनराय
  अम्बे मा लेखन सब वनराय
सब धरणी कागज कर लेवो-2 रूप वरण ना पाय
अर्ज...



6 घणी सुरंगी लोवड़ी ऐ मां,गजब चमकतो तेज
  अम्बे मां गजब चमकतो तेज
लोवड़ ओट रखो जोगणिया-2 खूब रँगी रँगरेज
अर्ज.....



7 जोत जगै नवखण्ड रमै मा,नवलख लोवड़याळ
   अम्बे मां नवलख लोवड़याळ
सांचो हेत हियै सूं राखो-2 गावै महेंद्र दान
अर्ज सुण........


 महेंद्र कविया भवानीपुरा 

राधा रो रो नीर बहावै राजस्थानी गीत

राधा रो रो नीर बहावै,आज्या सांवरिया-2

 1कान्हा इक बर पाछो आज्या 

आकर मनड़े नै बहला जा

 एकर आजा रे गोपाला.....2 

धेन चरावणीया 

(टेर) .....

 2एकर आजा रे बनवारी 

राह निहारै राधा थांरी 

थांरी सूरत पर बलिहारी....2 

जाऊं सांवरिया

(टेर) .....

 3मोहन मुरली मधुर बजा जा 

आ गोपी संग रास रचा जा 

बेगो आजा रे निर्मोही....2 

मन भावणीयां

(टेर)......

4थारी सांवली सूरत निराली 

सोहे मौर पंख छवी प्यारी 

दरश दिखाओ कृष्ण मुरारी.......2

 जगत चलावणीया

(टेर) ......

5राधा पाणी भरबा आई 

मन मै श्याम मुरतिया भाई 

राधा ऐसी भई दीवानी.....2 

फूटी गागरिया

(टेर) .....

6बेगा आवो हे अविनाशी 

राधा तव चरणों की दासी 

जोगी ऐसा जोग लगाया.....2

 हो गयी जोगनिया

(टेर).....

7राधा झूर झूर नीर बहावै 

 जुल्मी संवारियो कद आवै 

कीरत महेंद्र कविया गावै.....2 

पार लगावणीया

(टेर).....

राजस्थानी गीत आज्या म्हारै जीव की जड़ी

थारी सोवणी सूरत मन भाय,कि आज्या म्हारै जीव री जड़ी(टेर)        PLAY

 1केशर की क्यारी सी लागै,नव रस नीर भरै तेरे आगे 
 छवि छंदों की मंद पड़ी,कि आज्या म्हारै जीव की जड़ी 


 2चन्द सो रूप कनक सी दमके,दिल घायल जद चुड़ी खनके 
 जाणै फुरसत मै राम घड़ी,कि आज्या म्हारै जीव की जड़ी 



3निजर थारी मदहोश बणावै,बिन मदिरा मदपान करावै 
लागै दाखां री मदिरा भरी,कि आज्या म्हारै जीव की जड़ी 



4इमरत जेड़ा बोल सुहावै,मोहनी सूरत घणी मन भावै 
लागी थांसूं म्हारी प्रीत कड़ी,कि आज्या म्हारै जीव की जड़ी 


 5रूप देख भंवरा मंडरावै,जोध जवानी झोला खावै 
लागै फुलां री नरम कळी,कि आज्या म्हारै जीव की जड़ी 



6जद चालै चुनरी लहरावै,पायलड़ी दिन रैन जगावै 
थारी चाहत मैं नींद उड़ी,कि आज्या म्हारै जीव की जड़ी
            

गीत रँग वाळी रात

गीत-रंग वाळी रात।                                       PLAY

(तर्ज-छोटी सी उमर परणाई ओ बाबोसा)       

                       



रंग वाळी रात,बिताई रूड़ा मेहलां सूखो पड़ियो,हरियो बाग(टेर) 


1पाणीड़ो भरबा नै,पनघट निसरी प्यास जगी जोबन री 
बो निर्मोही कांई विरह पिछाणै जाय बस्यो है परदेश 


2सिर रो घड़ो,सब सखियां भरै है रीति है गागर मन री 
मन लोभीडो,कोई केहणो न मानै भँवर बसै है परदेश


 3सावण सुरंगों पिया,जोबन हठीलो सा जुल्मी नै कुण बिलमावै सा सजन बिना कुण कण्ठ लगावै विरहन करत पुकार 


 4मन भावन सावण जद आयो बोलै है कोयल प्यारी 
कोयल बोल कटारी सा लागै विरह सुणै ना कोय 


 5मन बेहलावण बागां गयी ही देख्या फुलड़ा भारी 
दमडा रो लोभी परदेश बसै है कांई म्हारै फुलड़ा रो मोल 



 6सोळा सिणगारी,पिया सुरमो सार्यो मरवण सेज सँवारे सा 
बलम बिना सूनी सेजड़ली कद निरखोला मोय 



 7सुण कुरजा,म्हारो भँवर मिला दो विरहन बाट निहारै सा 
कगलिया तूं गेहरो बोलिजे कठै तो सुणेला म्हारो पिव

             महेंद्र सिंह

                 भवानीपुरा

राजस्थानी कविता रँग

कविता 

 रँग रूड़ो रँग सांतरो,रँग ही राचै रास 

जीण रँग मै जीवन रच्यो,वो रँग रूड़ो खास 

 मोहक रँग है प्रेम रो,मारू मरवण साथ 

प्रीत रँग मै रँग रिया,रख हाथां मै हाथ 

 रख हाथां मै हाथ,गीत मिलण रा गावै 

प्रीत मै रँग दे सायबा,यो रँग कदे ना जावै

 बादळ गरजै बरखा बरसै,बीजळी ओला खावै

 सेजा नार पिया बिन तरसै,छैल भँवर कद आवै 

 सावण मै कोयल जद बोलै ,मीठा गीत सुणावै 

कोयल बोल कटारी लागै,ओ रँगड़ो नहीं भावै 

 चावो रँग है रण भूमि रो,जे कोई रँग लगावै 

प्रेम प्यार का सगळा ही रँग,इण रँग मै रळ ज्यावै 

 केशरिया रँग जो कोई रँग ले,शीश रक्त रो टीको

 सांचो रँग कोई रंगै शूरमा,बाकी सब रँग फीको

महेंद्र सिंह कविया

करणी वन्दना

चरण तुम्हारे चारणी,देवी मढ देसांण।

भवतारण मां भगवती,करणी सुण किनियांण।।१

सार संभालण सगती,है तोय सोह हाथ।

मार तार को मावङी,नमन तोय ओ नाथ।।२

बाल गिरधर री बिनती,एक सहाई आप।

पोषण कर मो पालणा,धन दोलत दें धाप।।३

****श्री करणी शरणम्****